雷利Training(18)

原來我星期日跑完，不知不覺已經過左四日啦。
見坐左幾日，日日夜夜不斷塞Ｄ野落個腦到，真係有Ｄ暈暈地架。
所以今晚點都出去郁下先。

食完飯，到九點半就換衫出發。　

見跑左幾次機場島，今晚就一於跑去映灣園嗰邊啦。

頭４Ｋ都保持到３０分鐘內，但尾既４Ｋ就唔掂啦，保持唔到咯。不過無所謂既，我都係想出一身汗啫。

跑既時候，確實係幾舒服架。腦可以靜落黎休息下，又可以排下垃圾出去。

跑完例牌濕到可以扭水啦。但我最鍾意係咁，嘻嘻！！！！

但有一樣好憎既係街上仍有不少黃金，真係請Ｄ狗主唔該做返一個有公德心既狗主啦。帶狗落街散步係絕對有呢個需要，我係明白既。但狗狗要大小便，呢Ｄ狗主應該帶備合適既清潔工具啦。搞到周街都係一舊二舊黃金，無Ｄ公德心，離譜左Ｄ咯！！！！

時間：１小時０２分鐘

距離：８.１７公里

消耗：６８９卡路里

那霸馬拉松 NaHa Marathon

藉着家庭旅行去沖繩，咁ｏ岩見到個時間係那霸馬拉松舉行既日子。所以呢.......就係６月嗰時報名啦。

而係今日８月７日公佈抽籤結果。

竟然又幸運地抽中左呀。

換句話說，繼上次２０１４年既阪馬後，我將會去完成第二隻既海外馬啦。

確實係有Ｄ緊張既。一來今次既完成時間係６小時１５分，相對阪馬的７小時為短。另外，是聽聞斜路起伏大。所以我今次都係以完賽為目標。

同樣，希望借著跑比賽，多Ｄ去練跑既同時，比自己理由去做下運動，減下肥啦。

加油呀！！！！

殺呀～～～～

那霸馬拉松網頁：
http://www.naha-marathon.jp/zh_tw/

路線圖：

沿路環境好似好正咁呀。

到時影多Ｄ相返黎分享下先～！！！

雷利Training (17)

星期四跑完之後，不知點解，訓捩頸呀，痛左幾日，半夜會痛到醒左，睡眠質素差到爆炸呀！！！

見咁多日都訓得差，又周身骨痛，今晚就諗諗下，不如都照落去跑下先。未必跑得長，但都出身汗啦。

其實星期五夜，去左同幾位CPE既同覺仔食自助餐，內咎感驅使我落去既動力大好多。呢幾位同覺仔好謙虛架，又肯幫人，實在難得架。係佢地身下學到好多做人處事既道理。正呀。

因此我都係死死氣咁落去，但氣溫有成３０度，好熱呀，點解夜晚都仲咁熱架？

我跑左入去機場，去到３Ｋ左右，唔得啦，要行啦，無力啦，好攰呀。。。。。

今晚係半行半跑之下，總算做左一小時既運動，自己都不禁比自己一個叻呀，哈哈！！！！

希望之後幾日都唔好落雨住，夜晚溫完書可以落去跑下啦。

時間：一小時

距離：７.２１公里

消耗：５９６卡路里

雷利Training(16)

今晚見有少少時間，所以決定十點左右落街跑下啦。

其實做下運動，出一身汗，都幾爽下架。尤其係壓力大既時候，更加需要去做運動，出汗比自己減下壓呀。

呢排不是溫書就係溫書，不斷地坐定定係到背背背.........好老實，真係幾攞命架。

但無計啦，自己想既唯有出力地做好啦。

講起今晚既跑步，天氣有成２９度架。係夜晚既時份有２９度既氣溫，想攞人命咩。我只係跑左３公里左右，已經感覺到件衫已經濕哂啦。當踩完機場出返黎東涌時，發覺頭、手、腳都係汗。不過我就係鍾意呢種濕哂既感覺。爽呀！！！！

上星期六跟左三位靚仔上山，行完肌肉是緊到不得了的。經過幾日既休息，今晚總算郁動自如啦。不再是緊緊的啦。

希望再操好Ｄ，減磅多Ｄ，到十月既雷利，可以同隊友一次過搞掂佢。完賽為目標，衝呀！！！！

時間：４２分鐘

距離：５.５９公里

消耗：４７６卡路里

話說當我跑完時，見頭髮未乾，就拎Ｄ筆記望下啦，但可樂就好似唔多想我溫習咯，仲要壓住唔比我睇咯！！！！

Try My Best

Remember I posted an article last 2nd June: https://doingwong.blogspot.com/2018/06/blog-post.html

This was in Chinese. 
I finished all examinations of Year 1 CPE Law Program. And I can enjoy my Summer Holiday. However, The result of the Examination released middle of July. I was failed two subjects out of three. Which means that I have to re-sit the examination.......>.<

Re-sit examination will be held on 15/8 and 18/8. 

Since I know that I have to retake the examination, I started to my preparation. So.....I have to sit in the self-study room after work.   Seems to be tiring but I need to struggle and put more effort to reach my main goal.

What subjects were I failed?

I failed Public Law and Contract Law.

I have to choose three questions each subject in the exam. And I have to memorize about 20 case laws and principle for each question. Was quite difficult for me so for this time I need more focus with this.

To the person who has a kind heart I would like to say Thank you for my classmate - Florence. She let me to borrow her personal notes for my reference when she knew my bad news. Perhaps it will help me a lot. Thank you very much.

To our Almighty God the Father thanked you so much for all of this despite of my failures but I am not hopeless with it.

You bless and graces are so great and so real.

Thank you !!!!

In self-study room of Public Library

雷利 training (15)

自從星期六上山之後，呢幾日Ｄ肌肉都好似唔係自己咁，特別是大腿肌肉..........嗰日上黃龍坑既一段路，可能揹住３Ｌ既水，負磅重左之下，當不斷地上上上上既時候，到尾段就開始賣老抽啦。

每逢賣完老抽，嗰一組肌肉都會痛幾日，我就係正正處於呢種痛楚之中啦，希望快Ｄ痛完啦。

呢排都經常坐定定溫書，預備補考，實在好痛苦架，又再一次面對考試。唉................

不過無計啦，當時自己病左咁考，發揮係受到好大既影響既，所以補考都正常。所以今次知道要補考之後，我十分著重身體既健康，唔要病住咁考試呀！！！！

今晚就見有Ｄ時間，就落一落街郁下啦。

只係跑左５Ｋ就無力啦，可能星期六既山上之旅令我未回復呀。不過唔緊要既，我想出身汗啫，出完身汗，爽哂！！！

今晚有個大大既月亮陪住我跑，同埋今日係七月既最後一日，落街郁下，都幾正下架！！！！

時間：４０分鐘

距離：５.２公里

消耗：４４３卡路里

雷利Training (14)

今日天朗氣清，一於上一上山先，順個便散一散呢排溫書既氣先。

今日原定路線：東涌～黃龍坑～大東山～伯公坳～鳯凰山～石門甲～東涌

但可惜天氣太熱啦，我帶左３Ｌ水，但當完成大東山到伯公坳時，只係剩返５００毫升水咋，實在太少，不宜博上去鳯凰啦，所以到左伯公坳後就落山閃咯。

早上同山友係富東邨食個靚早餐就出發啦。

一上黃龍坑都發覺好有問題，就係力量不夠，心肺好差，Ｄ汗不斷咁爆左出黎。同埋有ｄ賣老抽既感覺。

但上到大東山時，心情舒服哂，山上既境實在太靚啦。正呀！！！

當決定落山後，就經地塘仔去石門甲，但點解呢段路唔係落，反而係上上上上。。。。。散上加散，救命。
我己經無哂水，惟有忍耐到石門甲，打算去洗手間洗個面降下溫就算，但竟然係呢個時候，見到士多，即時眼發光，先隊左罐可樂先啦。哈哈！！！～～～

又一次救命可樂呀＠＠

如有機會，希望可以再上黎，除左練野之外，就係想欣賞神的創造。

正呀！！！

時間：７小時３３分
距離：１５.４４公里
消耗：１０７５卡路里

雷利 Training (13)

黎到第十三轉既雷利操練啦。

務求係十月十三同十四日有一個美好既完成賽事，盼望係呢段期間增強自己既心肺功能、肌力等等。所以一有時間就去練跑練氣。

今晚本來唔太想郁架，因為日頭有雨，放工返到屋企又覺得攰喎，所以想好好地抖下。但係呢，唔可以成日養豬架，所以都落街郁下啦。

本來都只係想跑６Ｋ左右就收工，但係跑下郁下，去到機場島就想跑多少少，所以跑左個圈咯。

呢個圈加埋有８.８８ＫＭ。。當中我覺得自己係有力左既，起碼頭５Ｋ可以ｋｅｅｐ到７分一Ｋ之內。之後就開始腳軟軟咁，但無計啦，少左練麻。我要再努力Ｄ先！！

雷利Training (12)

今晚本來好攰，唔想落街郁架，但係呢，中午午餐之後，係公司既飯後果，實在太邪惡呀。。。。。。

榴槤是家中違禁品，但是我十分喜歡食架，真係好好味咯！！

既然家中不能食，所以就在公司同幾位同事分享下啦。

係赤柱既３６０超巿買，都ＯＫ架。

食到咁飽，所以今晚點都要郁下啦。

可能星期日出力地跑左１１ＫＭ幾，今晚明顯好似力係好左，氣都順左，不過都只係限住頭５Ｋ，之後既２Ｋ幾就跌哂ＷＡＴＴ咯。不過無所謂啦，我只想練好Ｄ心肺，十月既雷利行得舒服Ｄ咋。

時間：５３分鐘

距離：７‧３６公里

消耗：６３９卡路里

雷利Training (11)

不知不覺黎到第十一野啦。

都其他只係Ｋｅｅｐ住郁下，藉著跑步、行山，唔好比自已停左落黎，咁就會不知不覺之下肥到爆架啦。

今晚無世界盃睇，但自己就抽起條根，好想再一次黎下９０分鐘既跑動啦。

於是我就一開始先黎一Ｋ後就熱身、拉根，之後就跑入去機場島啦。

今日沒有好似上次一野跑到盡頭，因為真係無乜力，所以定左只係跑３０分鐘就停一停，再跑３０分鐘再停一停，之後就再跑３０分鐘啦。

以我現時既速度，３０分鐘就大概４ＫＭ左右，再預計自己尾段無乜力，所以定左５‧７５就回頭啦。

沿路就都算ＯＫ既，起碼不是沙塵滾滾啦，跑落無乜人，都可以安安靜靜地享受出汗既。今晚我無帶耳機跑呀，希望聽下自己既呼吸聲同心跳聲。其實咁樣簡簡單單就跑，都幾享受呀！！

正呀！！！

時間：１小時３３分鐘

距離：１１‧６７公里

消耗：９７２卡路里

雷利Training (10)

繼續星期三完成左第一步後，今晚都黎多轉先。
再一次踏入機場島，行個圈先。

可能昨晚郁過下，今晚明顯身體上既力量同氣量都有改善，當然未到最佳效果，但總算跑起上黎，係舒服左既。

我要繼續努力，希望到十月既雷利舉行時，可能順利完成整個路段啦。

出力！！！！

雷利Training (9)

自星期六試完山路後，就抖左幾日啦。

身體真係要Ｄ時間復原架。

到左今晚星期三，都係時候復出啦。

當兩個女訓左時，就落去郁下先。

不過可能真係病完無耐，周身手軟腳軟咁。算啦，每次都有呢個階段既，久休之下既第一步係最困難。身體重左，力量細左，氣喘左，但堅持先重要。我點都要堅持落去完成今晚既目標，就係６Ｋ啦。

雖然時間慢左Ｄ，但踏出第一步先係最重要。

繼續努力！！！！

時間：５０分鐘

距離：６ＫＭ

消耗：５０５卡路里

雷利Training (8)

黎到雷利Training第八野啦。
今次一於試下路，路線由油塘到城門，全部都係衛亦信徑，跟住雷利既路線黎行，當試下路都好。
但可惜我星期三病左，未好哂，只係由油塘去到井欄樹就打道回府啦。
未病好去行山，只係好普通既上樓梯，已經攞左我命咁制。同埋腳軟先攞命，實在太少有呢個情況發生啦。所以都係提早返屋企抖下好過。

今次失步唔緊要，我既重點係健康，唔好因着做運動而損害左健康，咁就最不要得啦。

加油！！！！！

我要盡快好返，重出復仇呀！！！！

殺呀～～～～

時間：２小時１１分

距離：７‧５９公里

那霸馬拉松

我們原定在十二月初去旅行，今次去的目的地是沖繩。
昨天太太送完兩位公主返學之後，去了圖書館作資料搜集啦。
其中一本旅遊書中，提到那霸馬拉松，而今年舉行日期正正是我們在沖繩的期間。因此，太太通知我後，我就入官方網站睇下先。
官方網站：　http://naha-marathon.jp/zh_tw/

發覺除左日子適合，連賽道也十分適合。雖然賽道當中有大概十公里的上斜路段，但經過多年在香港渣打馬拉松的洗禮後，頓然覺得不是太困難吧。事關香港渣打馬拉松是眾多馬拉松賽道上下坡最多的。所以我想，我是可以應付那霸吧。

回想上一次參加海外馬拉松已是２０１４年咯。那時是參加大阪馬拉松，在烈日之下完成賽事，整個人都虛脫了。感謝太太同大女（當時細女在媽媽肚中）在終點等我，多謝你地。自從這次之後，心中確實很想很想完成多一次海外馬拉松，不過家中的女兒太細，不宜周遊列國啦。但今次家姐已經５歲，阿妹都３歲咯。是時候出發啦。

假如報名人數超過三萬人，大會會以抽籤形式決定參賽者。所以先報名，等結果吧！！

感謝太太提拱的資訊，她真的是十分了解我心中所想的。謝謝！！！

雷利Training (7)

今晚原本係打算睇完場英格蘭對巴拿馬先去跑步既，但係上半場已經５：０啦，睇怕下半場都無乜好睇架啦，所以吹左半場雞嗰下，我就換衫落樓咯。

由於突然間多左，所以今晚打算跑長少少，希望跑到１０Ｋ啦。

一起步，仲有少少微雨，惟有跑慢少少，好怕跣親，整傷左就唔好啦。

每一步除左留意速度之外，仲留意埋會唔會有黃金，因為東涌實在太多黃金啦。試過買左一對新鞋，第一晚落街就中招，真係好嬲架。真係唔該各位狗主，請你地多多留意一下。當然一讚既係，有Ｄ狗主好有公德心，一定會清理由佢地既愛犬所留下既任何大小二便啦。

其實跑到中段，已經無雨啦，反而有點焗，Ｄ汗就不斷爆左出黎咯。正呀！！！

時間：１小時１５分鐘

距離：１０ＫＭ

消耗：８４７卡路里

雷利 Training (6)

轉下眼，已到左第六轉既雷利操練啦。

由於呢排世界盃既關係，八點開波，完場都成十點，太夜又唔想落樓跑。

所以今日一於係午膳時間，去感受一下烈陽啦。

其實烈陽一下都好既，讓身體適應一下不同既天氣之下運動麻。是關山賽呢家野真係隨時食哂陽光同暴雨。

好記得2001年嗰次既毅行經歷，到今日我都驚驚地。起步時是熱同曬，到黃昏開始多雲，跟住夜晚六點幾開始落雨，落到零晨。結果我們四個人一隊既，當中兩個因太大雨，加上不斷跣親受傷，所以提早收工。剩返我同另一個隊友堅持行到尾，時間已經不重要，目的只想完賽。結果我地用左３３小時。因著雨水同濕濕既泥路，我地係用多幾倍體力去應負，真係好攞命。

所以今次雷利，有成８０公里，睇怕到時不會全程都係陽光掛，預會落雨，心情可能會好Ｄ。　所以都係操練時，加一點元素落去，令自己身體及早適應下。同埋，只跑平路會悶，加Ｄ上斜落斜，都好玩下架。

出力！！～～

時間：40:47

距離：5.02公里

消耗：414卡路里

雷利 training (5)

黎到第五課啦，因今日係端午節係假期，所以留係家陪下大中小公主啦。陪佢地之餘，都不忘去練下跑，不過今日真係咪講笑，好熱好焗好辛苦。只係跑左７Ｋ，但其實我去到３Ｋ左右，已經唔想郁啦，實在太熱啦，成３１度呀。

身體未適應得哂呢個夏天呀。

要繼續努力Ｄ先！！！

時間：56:27
距離：7.01ＫＭ
消耗：585卡路里

屬靈書藉：我們的教會

經過左漫長的法律學位的第一年既課程、考試、溫習之後，又係時間拎起閱讀屬靈書既決心啦。

事關平時差Ｄ連睇聖經既時間都沒有，何況睇屬靈書呢。所以襯住暑期開始，就即刻拎起Ｄ屬靈書望下先。

本年度第一本屬靈書係我們的教會。是我受浸時，教會送給我的。旨在讓受浸既弟兄姊妹對教會的歷史、方向得到認識。

我很多年前已經看過了，今次突然想睇返，我相信是聖經的提醒吧。不知甚的，在一個聚會裏，講起元朗余園那個地方，當講到一些歷史時，我心中裏有一個提醒，就係要多些認識教會的由來，其實最主要是看看前人，一些長輩所行過屬靈路上既足跡。以給看看主的恩典如何在教會中實實在在地運行。

當中有幾件事可以分享一下。

１：美姑娘

美姑娘是開辦喜樂福音堂的。她很愛主的，甚至愛到一個地步，接受主既差遺來到香港傳福音。實在好感典有一個主既使女願意犠牲自己來傳福音。

２：胡恩德先生

胡先生是我有親眼見過既一位長輩，他與主既深入交通，最吸引我。

３：另外書中有提及傳道人如何依靠主既提應，實在令我佩服

閱讀全書後，發覺自己既靈命十分之差，差到一個地步，覺得自己與初信的沒有甚麼分別。確實需要主既憐忟，讓我把起初既愛心重拾回來。求主施恩！！！！

讀完呢本書，向下一本出發！！！加油！！

雷利Training (4)

今晚係世界杯開鑼日子啦。

頭場係俄羅斯對沙特阿拉伯，雖不是一些傳統勁旅對賽，但這是全個世界杯的第一場，點都支持下既！

睇波之餘，都不忙去練下心肺。唔好為左睇波而影響自己既體能訓練、心肺訓練。

見時間尚可，就一於出去執返幾Ｋ先。

今晚無雨，天氣唔算好焗，仲有少少風，不過Ｄ風吹埋黎係暖暖的。始終夏天，廿幾三十度，無計。當係比自己身體好好適應下啦。

雖然只係執左６Ｋ，但出一身汗，又拉下根。總感覺得好過坐係屋企發呆。正呀！！！

時間：52:14分鐘

距離：6.34公里

消耗：516卡路里

雷利 Training (3)

呢幾日都落大雨......落到成個人都沉哂.....完全無郁過.

不過今晚好似有D轉機,晚上有一陣無雨,咁可以落去郁下啦.

本來想跑長少少,去到映灣園,但係呢,見個天D雲又厚左,好似想落雨咁,

所以都係是旦跑去碼頭,沿海來回算啦.

不過呢,來回到咁上下,真係有D悶.....再加上個地下因著雨水有D跣,為免跣親,所以計過有5K,就不如返屋企行下樓梯啦.

由地下殺上天台36樓..........

一行就心知不妙啦,,,,,好喘氣......好攰.....無力.....心跳爆標......D汗狂爆......救命.......乜行樓梯咁辛苦既. >.<

唔得...我要加多兩把勁,操練好D,要將條雷利徹底搞掂佢!!!!!!!

衝呀!!!!!!

時間: 57:45分鐘

距離: 6.09KM

消耗: 505卡路里

雷利training (2)

昨晚跑完,今晚都心思思想郁下.

結果等兩位公主訓左,我又係夜晚8點40分左右出動啦.

可以昨晚跑完,未回到氣,今晚跑落......感覺無乜力.

見身體比昨日更郁唔到,所以都係跑慢慢少少.本想跑佢8km,不過...........感覺唔多掂,都係跑佢6km算數.

始終今個月既頭半個月係適應期,唔到谷爆自己先. 如果傷左,就乜都無得玩,要坐係屋企發呆啦.........

今晚一拉完根,就轉去機場島一轉,無黎咁耐, 點都入去踩一踩個島先. 但今次有成30度,真係感覺差左好多,去到只係3km左右,已經無乜力啦. 惟有龜速咁跑,唔要個速度,只想完成咁去啦.

連跑左兩個晚上,聽日一定要休息下,最多都只係係屋企拉下根算啦.唔可以一次過跑咁多......出力!!!!!

時間: 47分鐘

距離: 6.10km

消耗: 517卡路里

雷利Training (1)

今次是認真對待雷利為個山賽game.

因為真係不要講笑,全程80KM,是我自2011年玩完毅行者之後,再長距離既一個賽事.

雷利山賽是一個以衛奕信徑為主要路線,將會由香港的陽明山莊出發,去到鰂魚涌搭交通工具去油塘,再行去城門,再上到大埔,然後經一經八仙嶺,到終點.

真係不要講笑,全程80Km,唔係平路,係有上有落既山路. 所以希望係10月13號出發前,可以減一減磅,目標是減20磅左右.咁樣就應該除左心肺功能好D之外,負磅少D,行起上黎都舒服D啦.

今晚就係打風後第一晚既長跑操練,都有成28度,好焗上,所以跑完D汗又係收唔到制咁,不斷爆出黎. 因為之後考試,幾個星期無郁到,今晚就試跑一小時,比自己個身體適應下先.

讚一讚自己先,係咁差既身體情況下,都可以一小時Keep到有8K,都算交代到啦.

希望心肺功能慢慢提升,繼續享受出汗既樂趣!!!

時間: 60分鐘

距離: 8.08km

消耗: 693卡路里

雷利 + The North Face

好老實,當完成左第一年既CPE既課程同考試之後,就發覺要對自己好D,唔可以只坐係圖書館溫書....溫書....同溫書.....

所以我又黎啦,藉著報比賽去逼自己做運動. 由以往一年先報一次既全馬比賽, o者係渣打馬拉松,今次我仲報左雷利衛徑長征越野跑步,其實佢個名係越野跑,不過我好大相信我只係越野行架咋. 大佬呀....大大話話成80KM咯,點全程跑得哂呀!!!!! 想提早返天家咩??

哈哈~~~~

好,,,第𠄠個game就係The North Face 100. 不過我只係報50算啦,玩100太辛苦啦. 玩50就應該可以夜晚返到屋企訓, 唔洗玩通宵咁大鑊既......

希望藉著比賽, 可以逼自己郁多D,唔好單單只係坐係到啦.

加油!!!!

完成第一年

自4月20日交左EU份功課後，就開始溫書啦。

經過係香港大學既圖書館溫書.....溫書....同溫書.........

但好境不常，在臨考前一個星期病倒了。雖不是大病，但成個人都呆呆滯滯般，十分攞命。

溫書既進度大受影響。

在考Tort個日，雖然是夜晚才考，但我是請了一整的假，原因是我沒有完全溫習妥當。唉..........

到晚上考時，成個人都很熱的，可能真的未好哂.........結果我所預備的三條題目，只記得一條多ＤＤ.........我所預備既有Negligence, Trespass to the Person, Occupier Liability.

輪到Contract，這一科比較有信心，但是在考前的早上，仍只是預備兩條左右，臨考前的半小時才看多一點點第三條。但是記憶有限，加上身體還未完全康復之下，就只能在混沌之中完成。我這一科所預備的是 Agreement - Offer and Acceptance, Misrepresentation, Frustration.

好啦,輪到最後一科,人稱死亡科目.我所預備的三條都是problem question.原因是我對自己寫essay完全沒有信心. 我所預備的三條題目是 Parliamentary Sovereignty, Judicial Review - Illegality & Irrationality, Procedural Impropriety. 今次痛定思痛,一於請左三日假去全力預備, 當然發揮是正常啦. 純個人感覺的. 至少我是認為自己是發揮到應有水平先啦. PS我寫左8版,

JR-PI寫左七版,但時間剩返不多之下,加上JR-II比較多野要諗,所以留到最後,結果只寫左開頭,未入戲肉就夠鐘了.

總結來說,今次的預備上,是安排得比較差.下次再考試時,我應加入"病"的元素,為免重蹈覆徹,第𠄠年真的會打算早一點去預備考試,不應在考前一個月左右,而是應在年頭要開始寫notes,記csaes, principles, rule.......

好~~~~放暑期了,就好好享受一下我所喜愛的跑步與行山咯!!!

出力!!!!!

打大佬

講下講下 ,轉個眼就到一年一度的打大佬啦“渣打馬拉松”。

記得舊年不知幾時講過，要完成一個全馬＋一個山賽。
山賽就係１０月時，苗圃挑戰１２小時就ＫＯ左。
雖然時間不太靚，但總算可以交代到，我完成食左一碟山賽。

好啦，今個星期日就是打大佬啦。一如以往，因著上堂、功課、病，結果都是預備不太足夠。

盼望可以完成到啦！！！